Hverfið mitt 2020-2021

Hugmyndasöfnun fyrir verkefnið Hverfið mitt fór fram dagana 4. nóvember 2020 til 20. janúar 2021. Alls sendu Reykvíkingar inn 1320 hugmyndir og aldrei áður hafa jafnmargir tekið þátt í hugmyndasöfnun og heimsótt vefinn á meðan hugmyndasöfnun stóð yfir.

Líkt og áður var öllum heimilt að skila inn hugmynd og voru hugmyndasmiðir hvattir til að skila vel unnum hugmyndum inn í samræmi við forsendur hugmyndasöfnunarinnar. 

Þetta var í níunda skiptið sem hugmyndasöfnunin fór fram. Að lokinni hugmyndasöfnun tók við mat fagteymis Reykjavíkurborgar og leitað var til sérfræðinga víða innan sem og utan borgarkerfisins til að meta hvort hugmyndir uppfylli reglur verkefnisins og séu framkvæmanlegar. Við mat á hugmyndum leitaði starfsfólk verkefnisins allra leiða til þess að útfæra hugmyndirnar svo kjósa mætti um þær og í ýmsum tilfellum var haft samband við hugmyndahöfunda til þess að breyta hugmyndum svo þær væru tækar fyrir kosningu.

Þegar yfirferð hugmynda var lokið fór fram uppstilling kjörseðla. Uppstilling kjörseðla fór fram á opnum og rafrænum fundum í íbúaráðum hverfanna þar sem allir sem vildu gátu mætt á fundinn og tekið þátt í uppstillingunni. Þátttaka í uppstillingunni var góð og tóku íbúar hverfanna virkan þátt í að velja þær hugmyndir sem fóru síðan í hverfakosningu.