Hverfið mitt 2019

Hugmyndasöfnun fyrir verkefnið Hverfið mitt fór fram dagana 20. mars til 9. apríl 2019. Alls bárust 1053 hugmyndir. Aldrei áður hafa jafnmargir heimsótt vefinn á meðan hugmyndasöfnun stóð yfir.

Nýjungar í þessari hugmyndasöfnun voru að hægt var að senda inn hugmyndir á formi myndbands og hljóðupptöku.

Inn komu 10 myndbönd og ein hljóðupptaka. 55% hugmynda komu frá konum og 45% frá körlum. Líkt og áður var öllum heimilt að skila inn hugmynd og voru hugmyndasmiðir hvattir til að skila vel unnum hugmyndum inn í samræmi við forsendur hugmyndasöfnunarinnar.

Þetta var í áttunda skiptið sem hugmyndasöfnunin fór fram. Að lokinni hugmyndasöfnun tók við mat fagteymis Reykjavíkurborgar sem samanstendur m.a af fulltrúum frá samgöngudeild og deild opinna svæða, sérfræðingum í lýsingarmálum, göngustígum og götum og garðyrkjustjóra ásamt því að þegar upp komu verkefni sem kröfðust enn frekara sérfræðiálits var haft samband við viðeigandi sérfræðinga.

Þegar matinu var lokið var boðað til opinna funda í hverfum Reykjavíkurborgar. Þar voru allar hugmyndir sem dæmdar voru tækar settar upp á vegg til sýnis. Þá gátu íbúar komið og valið allt að 25 hugmyndir á kjörseðil. Í framhaldi voru atkvæðin talin og í ljós kom hvernig kjörseðlar allra hverfa kæmu til með að líta út.